ਸਾਹਨੇਵਾਲ ਕਾਂਗਰਸ ‘ਚ ਬਗਾਵਤ ਦੀ ਚਿੰਗਾਰੀ ਭੜਕੀ! ਸੀਨੀਅਰ ਆਗੂਆਂ ਵੱਲੋਂ ਬਾਜਵਾ ਖਿਲਾਫ ਖੁੱਲ੍ਹੀ ਜੰਗ ਦਾ ਐਲਾਨ

“ਬਾਹਰੀ ਨਹੀਂ, ਸਥਾਨਕ ਨੂੰ ਟਿਕਟ ਦਿਓ”! 2027 ਚੋਣਾਂ ਤੋਂ ਪਹਿਲਾਂ ਹਾਈ ਕਮਾਂਡ ਨੂੰ ਤਿੱਖੀ ਚੇਤਾਵਨੀ

  ਲੁਧਿਆਣਾ, 16 ਅਪ੍ਰੈਲ (ਹਰਸ਼ਦੀਪ ਸਿੰਘ ਮਹਿਦੂਦਾਂ)- ਵਿਧਾਨ ਸਭਾ ਹਲਕਾ ਸਾਹਨੇਵਾਲ ਵਿੱਚ ਕਾਂਗਰਸ ਪਾਰਟੀ ਅੰਦਰੂਨੀ ਟਕਰਾਅ ਹੁਣ ਖੁੱਲ੍ਹੇ ਬਗਾਵਤੀ ਰੂਪ ਵਿੱਚ ਸਾਹਮਣੇ ਆ ਰਿਹਾ ਹੈ। ਸਾਬਕਾ ਜ਼ਿਲਾ ਦਿਹਾਤੀ ਪ੍ਰਧਾਨ ਗੁਰਦੇਵ ਸਿੰਘ ਲਾਪਰਾਂ ਦੀ ਅਗਵਾਈ ਹੇਠ ਵੱਡੀ ਗਿਣਤੀ ਵਿੱਚ ਸੀਨੀਅਰ ਕਾਂਗਰਸੀ ਆਗੂ ਪਾਲ ਸਿੰਘ ਗਰੇਵਾਲ ਦੇ ਮੁੱਖ ਦਫ਼ਤਰ ਵਿੱਚ ਇਕੱਠੇ ਹੋਏ, ਜਿੱਥੇ ਮਾਹੌਲ ਪੂਰੀ ਤਰ੍ਹਾਂ ਸਿਆਸੀ ਤਣਾਅ ਨਾਲ ਭਰਿਆ ਨਜ਼ਰ ਆਇਆ।

  ਇਸ ਮੌਕੇ ਨਗਰ ਕੌਂਸਲ ਸਾਹਨੇਵਾਲ ਦੇ ਸਾਬਕਾ ਪ੍ਰਧਾਨ ਸੁਖਜੀਤ ਸਿੰਘ ਸੁੱਖੀ ਹਰਾ, ਸੀਨੀਅਰ ਆਗੂ ਐਡਵੋਕੇਟ ਮਨਵੀਰ ਸਿੰਘ ਧਾਲੀਵਾਲ, ਯੂਥ ਆਗੂ ਲੱਕੀ ਸੰਧੂ, ਸਾਬਕਾ ਕੌਂਸਲਰ ਸੁਖਵਿੰਦਰ ਸਿੰਘ ਬੱਲੂ, ਸੀਨੀਅਰ ਆਗੂ ਸਤਿੰਦਰ ਸਿੰਘ ਤਾਜਪੁਰੀ, ਸਾਬਕਾ ਸਰਪੰਚ ਜੋਰਾ ਸਿੰਘ ਗਰੇਵਾਲ, ਇੰਟਕ ਜ਼ਿਲਾ ਪ੍ਰਧਾਨ ਐਸ.ਪੀ.ਐਸ ਗਿੱਲ ਅਤੇ ਯੂਥ ਆਗੂ ਬੱਬੀ ਮੁੰਡੀਆਂ ਸਮੇਤ ਹੋਰ ਆਗੂਆਂ ਨੇ ਹਲਕੇ ਦੀ ਸਿਆਸੀ ਸਥਿਤੀ ‘ਤੇ ਗੰਭੀਰ ਚਰਚਾ ਕੀਤੀ। ਇਕੱਠ ਦੌਰਾਨ ਆਗੂਆਂ ਨੇ ਇਕਸੁਰ ਹੋ ਕੇ ਵਿਕਰਮ ਬਾਜਵਾ ਦੇ ਖਿਲਾਫ ਮੋਰਚਾ ਖੋਲ੍ਹਦੇ ਹੋਏ ਦੋਸ਼ ਲਗਾਇਆ ਕਿ ਬਾਹਰੀ ਚਿਹਰਿਆਂ ਨੂੰ ਥੋਪਣ ਦੀ ਨੀਤੀ ਨੇ ਕਾਂਗਰਸ ਨੂੰ ਹਲਕੇ ਵਿੱਚ ਲਗਾਤਾਰ ਕਮਜ਼ੋਰ ਕੀਤਾ ਹੈ। ਉਨ੍ਹਾਂ ਨੇ ਸਪੱਸ਼ਟ ਕੀਤਾ ਕਿ ਪਿਛਲੇ ਲਗਭਗ 25 ਸਾਲਾਂ ਤੋਂ ਸਥਾਨਕ ਆਗੂਆਂ ਦੀ ਅਣਦੇਖੀ ਕਾਰਨ ਪਾਰਟੀ ਹਾਰ ਦਾ ਸਿਲਸਿਲਾ ਨਹੀਂ ਤੋੜ ਸਕੀ।

  ਆਗੂਆਂ ਨੇ ਦਲੀਲ ਦਿੱਤੀ ਕਿ ਵਿਕਰਮ ਬਾਜਵਾ ਦੀਆਂ ਲਗਾਤਾਰ ਹਾਰਾਂ ਨੇ ਨਾ ਸਿਰਫ ਪਾਰਟੀ ਦੀ ਪਕੜ ਕਮਜ਼ੋਰ ਕੀਤੀ ਹੈ, ਸਗੋਂ ਵਰਕਰਾਂ ਦੇ ਮਨੋਬਲ ‘ਤੇ ਵੀ ਅਸਰ ਪਾਇਆ ਹੈ। ਉਨ੍ਹਾਂ ਨੇ ਇਹ ਵੀ ਆਰੋਪ ਲਗਾਇਆ ਕਿ ਸੀਨੀਅਰ ਆਗੂਆਂ ਦੀ ਅਣਗਹਿਲੀ ਅਤੇ ਅੰਦਰੂਨੀ ਧੜੇਬੰਦੀ ਨੇ ਪਾਰਟੀ ਦੇ ਅਧਾਰ ਨੂੰ ਹਿਲਾ ਕੇ ਰੱਖ ਦਿੱਤਾ ਹੈ, ਜਿਸ ਕਾਰਨ ਕਈ ਨਿਸ਼ਠਾਵਾਨ ਵਰਕਰ ਪਾਰਟੀ ਤੋਂ ਦੂਰ ਹੋ ਚੁੱਕੇ ਹਨ।

  ਹਾਈ ਕਮਾਂਡ ਨੂੰ ਤਿੱਖਾ ਸੰਦੇਸ਼ ਦਿੰਦਿਆਂ ਆਗੂਆਂ ਨੇ ਚੇਤਾਵਨੀ ਦਿੱਤੀ ਕਿ ਜੇ 2027 ਦੀਆਂ ਚੋਣਾਂ ਲਈ ਵੀ ਹਲਕੇ ਦੇ ਆਪਣੇ ਅਤੇ ਵਫ਼ਾਦਾਰ ਆਗੂ ਨੂੰ ਟਿਕਟ ਨਾ ਦਿੱਤੀ ਗਈ, ਤਾਂ ਕਾਂਗਰਸ ਨੂੰ ਇੱਕ ਵਾਰ ਫਿਰ ਭਾਰੀ ਸਿਆਸੀ ਨੁਕਸਾਨ ਝੇਲਣਾ ਪੈ ਸਕਦਾ ਹੈ।

ਇਸ ਦੌਰਾਨ ਸਾਰੇ ਆਗੂਆਂ ਨੇ ਆਪਸੀ ਏਕਤਾ ਦਾ ਪ੍ਰਗਟਾਵਾ ਕਰਦਿਆਂ ਭਰੋਸਾ ਦਿਵਾਇਆ ਕਿ ਜੇ ਸਥਾਨਕ ਉਮੀਦਵਾਰ ਨੂੰ ਮੌਕਾ ਦਿੱਤਾ ਜਾਂਦਾ ਹੈ, ਤਾਂ ਉਹ ਇਕਜੁੱਟ ਹੋ ਕੇ ਪੂਰੀ ਤਾਕਤ ਨਾਲ ਚੋਣ ਮੈਦਾਨ ਵਿੱਚ ਉਤਰਣਗੇ ਅਤੇ ਜਿੱਤ ਨੂੰ ਯਕੀਨੀ ਬਣਾਉਣ ਵਿੱਚ ਅਹਿਮ ਭੂਮਿਕਾ ਨਿਭਾਉਣਗੇ।

ਬਿਜਲੀ ਨਿਗਮ ਦੇ ਮੁੱਖ ਦਫਤਰ ਅੱਗੇ ਅਪਰੈਂਟਸ਼ਿਪ ਲਾਈਨਮੈਨਾਂ ਦਾ ਆਇਆ ਜਨ ਸ਼ੈਲਾਬ

ਧਰਨੇ 'ਤੇ ਅੜ੍ਹੇ ਅਪਰੈਂਟਸ਼ਿਪ ਲਾਇਨਮੈਨਾਂ ਦੇ ਸੂਬਾ ਪ੍ਰਧਾਨ ਸੁਰਿੰਦਰ ਸਿੰਘ ਦੀ ਦੋ ਟੁੱਕ 

ਏਥੇਂ ਆਏ ਹਾਂ ਤਾਂ ਕੁਝ ਲੈ ਕੇ ਜਾਵਾਂਗੇ ਨਾ ਦਿੱਤਾ ਤਾਂ ਆਮ ਆਦਮੀ ਪਾਰਟੀ ਦਾ ਹੋਵੇਗਾ ਬਾਈਕਾਟ

  ਪਟਿਆਲਾ 9 ਅਪ੍ਰੈਲ (ਸੋਨੀ ਭੜੋਅ, ਗੁਰਸੇਵ ਸਿੰਘ) 2600 ਅਪ੍ਰੈਂਟਸ਼ਿਪ ਯੂਨੀਅਨ ਦੇ ਸੂਬਾ ਪ੍ਰਧਾਨ ਸੁਰਿੰਦਰ ਸਿੰਘ ਜਲਾਲਾਬਾਦ ਦੇ ਇੱਕ ਬੋਲ 'ਤੇ ਬਿਜਲੀ ਨਿਗਮ 'ਚ ਲਾਈਨਮੈਨ ਦੀ ਅਪ੍ਰੈਂਟਸਿਪ ਕਰ ਰਹੇ ਸੂਬੇ ਭਰ ਦੇ ਨੌਜਵਾਨਾਂ ਦਾ ਪਟਿਆਲਾ ਮੁੱਖ ਦਫਤਰ ਅੱਗੇ ਸ਼ੈਲਾਬ ਆ ਗਿਆ ਅਤੇ ਉਨ੍ਹਾਂ ਪਹਿਲੇ ਦਿਨ ਹੀ ਬਿਜਲੀ ਨਿਗਮ ਦੇ ਮੁੱਖ ਦਫਤਰ ਨੂੰ ਸ਼ਾਮ ਤੱਕ ਘੇਰੀ ਰੱਖਿਆ। ਧਰਨਾ ਖਤਮ ਹੋਣ ਤੋਂ ਬਾਅਦ ਵੀ ਇਨ੍ਹਾਂ ਨੌਜਵਾਨਾਂ ਅੰਦਰ ਅਪਣਾ ਰੁਜਗਾਰ ਬਚਾਉਣ ਦੇ ਪੈਦਾ ਹੋਏ ਜੋਸ਼ ਨੇ ਪਹਿਲੀ ਵਾਰੀ ਨਵਾਂ ਇਤਿਹਾਸ ਸਿਰਜ ਦਿੱਤਾ ਕਿ ਉਨ੍ਹਾਂ ਦੋਵਾਂ ਰੋਡਾਂ ਨੂੰ ਜਾਮ ਕਰਕੇ ਸਾਰੀ ਰਾਤ ਏਥੇ ਹੀ ਕੱਟੀ। ਨੌਜਵਾਨਾਂ ਦੇ ਜੋਸ਼ ਨੂੰ ਦੇਖਕੇ ਨਹੀਂ ਲੱਗਦਾ ਕਿ ਉਹ ਅਪਣੀਆਂ ਮੰਗਾਂ ਮਨਵਾਏ ਬਿਨ੍ਹਾਂ ਵਾਪਸ ਜਾਣਗੇ। ਬਿਜਲੀ ਨਿਗਮ ਲਈ ਕੱਲ ਦਾ ਦਿਨ ਹੋਰ ਵੀ ਭਾਰੀ ਰਹਿਣਾ ਹੈ ਕਿਉਂਕਿ ਸੂਬੇ ਭਰ ਦੇ ਕੱਚੇ ਕਾਮੇਂ ਦੋ ਦਿਨ ਤੋਂ ਪਹਿਲਾਂ ਹੀ ਕੰਮ ਛੱਡ ਕੇ ਹੜਤਾਲ ਉੱਤੇ ਗਏ ਹਨ ਅਤੇ ਸਾਰੇ ਪੱਕੇ ਮੁਲਾਜਮ ਬਿਜਲੀ ਏਕਤਾ ਮੰਚ ਅਤੇ ਜੁਆਇੰਟ ਫੋਰਮ ਦੇ ਸੱਦੇ 'ਤੇ ਜਿਨ੍ਹਾਂ ਦਾ ਸਹਿਯੋਗ ਏਓਜੇਈ ਤੇ ਸਬ ਸਟੇਸ਼ਨ ਯੂਨੀਅਨ ਵੀ ਕਰ ਰਹੀ ਹੈ, 10 ਅਪ੍ਰੈਲ ਨੂੰ ਕੰਮ ਛੱਡਕੇ ਪਟਿਆਲਾ ਮੁੱਖ ਦਫਤਰ ਧਰਨਾ ਦੇਣ ਪਹੁੰਚ ਰਹੇ ਹਨ।ਇਸ ਕਾਰਨ ਅੱਜ ਸੂਬੇ ਭਰ ਦੇ ਬਿਜਲੀ ਖਪਤਕਾਰਾਂ ਨੂੰ ਭਾਰੀ ਪ੍ਰੇਸ਼ਾਨੀਆਂ ਦਾ ਸਾਹਮਣਾ ਕਰਨਾ ਪੈ ਰਿਹਾ ਹੈ ਅਤੇ ਜੇਕਰ ਮੌਸਮ ਦਾ ਮਿਜਾਜ ਹੋਰ ਵਿਗੜ ਗਿਆ ਤਾਂ ਹਾਲਾਤ ਵਸੋਂ ਬਾਹਰ ਹੋ ਸਕਦੇ ਹਨ। ਪਰ ਬਿਜਲੀ ਨਿਗਮ ਦੀ ਮੈਨੇਜਮੈਂਟ ਕਹਿ ਲਵੋ ਜਾਂ ਪੰਜਾਬ ਸਰਕਾਰ ਦੋਵੇਂ ਅਕਲ ਤੋਂ ਕੰਮ ਨਹੀਂ ਲਏ ਰਹੀਆਂ ਤੇ ਏਨ੍ਹਾਂ ਅਜੇ ਤੱਕ ਗੇਟ ਅੱਗੇ ਡਟੇ ਹਜਾਰਾਂ ਅਪ੍ਰੈਂਟਸ਼ਿਪ ਕਰ ਰਹੇ ਨੌਜਵਾਨਾਂ ਨਾਲ ਗੱਲ ਕੀਤੀ ਅਤੇ ਨਾ ਹੀ ਮੁਲਾਜਮ ਜੱਥੇਬੰਦੀਆਂ ਦੇ ਸਾਂਝੇ ਥੜੇ ਨਾਲ। ਮੁਲਾਜਮਾਂ ਤੋਂ ਰੋਹ ਤੋਂ ਲੱਗਦਾ ਹੈ ਕਿ ਅਪਣੀਆਂ ਮੰਗਾਂ ਦੇ ਪੱਕੇ ਹੱਲ ਤੋਂ ਬਿਨ੍ਹਾਂ ਉਹ ਇਸ ਵਾਰ ਪਿੱਛੇ ਨਹੀਂ ਹੱਟਣਗੀਆਂ ਤੇ ਅਪ੍ਰੈਂਟਸ਼ਿਪ ਲਾਈਨਮੈਨ ਤਾਂ ਕਿਸੇ ਵੀ ਹਾਲਤ 'ਚ ਪਿੱਛੇ ਹੱਟਦੇ ਨਜਰ ਨਹੀਂ ਆ ਰਹੇ। ਉਨ੍ਹਾਂ ਦੇ ਸੂਬਾ ਪ੍ਰਧਾਨ ਸੁਰਿੰਦਰ ਸਿੰਘ ਜਲਾਲਾਬਾਦ ਦੀ ਤਾਂ ਸਰਕਾਰ ਅਤੇ ਮੈਨੇਜਮੈਂਟ ਨੂੰ ਦੋ ਟੁੱਕ ਆ ਕਿ ਏਥੇਂ ਆਏ ਹਾਂ ਤਾਂ ਕੁਝ ਲੈ ਕੇ ਜਾਵਾਂਗੇ, ਨਾ ਦਿੱਤਾ ਤਾਂ ਆਮ ਆਦਮੀ ਪਾਰਟੀ ਦਾ ਪੰਜਾਬ 'ਚ ਬਾਈਕਾਟ ਹੋਵੇਗਾ। 

  ਲਗਾਏ ਗਏ ਧਰਨੇ ਬਾਰੇ ਜਾਣਕਾਰੀ ਦਿੰਦਿਆਂ ਪ੍ਰਧਾਨ ਸੁਰਿੰਦਰ ਸਿੰਘ, ਉਪ ਪ੍ਰਧਾਨ ਸਤਨਾਮ ਸਿੰਘ, ਸਕੱਤਰ  ਫਤਿਹ ਸਿੰਘ, ਖਜਾਨਚੀ ਮਨਪ੍ਰੀਤ ਸਿੰਘ, ਜਗਤਾਰ ਸਿੰਘ ਨੇ ਪੱਤਰਕਾਰਾਂ ਨਾਲ ਗੱਲ ਕਰਦਿਆਂ ਕਿਹਾ ਕਿ ਬਿਜਲੀ ਨਿਗਮ 'ਚ ਅਪਰੈਂਟਸ਼ਿਪ ਟ੍ਰੇਨਿੰਗ ਕਰ ਰਹੇ 2600, ਇਸਤੋਂ ਪਹਿਲਾਂ ਕਰ ਚੁੱਕੇ ਜਾਂ ਉਸ ਤੋਂ ਵੀ ਪਹਿਲਾਂ ਸਹਾਇਕ ਲਾਈਨਮੈਨ ਦਾ ਟੈਸਟ ਤੱਕ ਪਾਸ ਕਰ ਚੁੱਕੇ ਸਾਥੀਆਂ ਨੂੰ ਪਹਿਲ ਦੇ ਆਧਾਰ 'ਤੇ ਰੁਜਗਾਰ ਦਿਵਾਉਣ ਲਈ ਬਜਿੱਦ ਹਾਂ ਤੇ ਏਨ੍ਹਾਂ ਨੂੰ ਅਪਰੈਂਟਸ਼ਿਪ ਦੀ ਯੋਗਤਾ ਦੇ ਅਧਾਰ 'ਤੇ ਰੁਜਗਾਰ ਦੁਆ ਕੇ ਰਹਾਂਗੇ। ਉਨ੍ਹਾਂ ਕਿਹਾ ਕਿ ਅਸੀਂ ਆਈਟੀਆਈ ਪੱਧਰ 'ਤੇ ਕੀਤੀ ਜਾਣ ਵਾਲੀ ਸਹਾਇਕ ਲਾਈਨਮੈਨ ਦੀ ਭਰਤੀ ਦੇ ਵਿਰੋਧ 'ਚ ਨਹੀਂ ਹਾਂ ਕਿਉਂਕਿ ਅਸੀਂ ਖੁਦ ਵੀ ਆਈਟੀਆਈ ਹੋਲਡਰ ਹਾਂ। ਅਸੀਂ ਸਰਕਾਰ ਦੀ ਇਸ ਨੀਤੀ ਚੋਂ ਸਾਫ ਝੱਲਕਦੀ ਉਸਦੀ ਮਾੜੀ ਨੀਅਤ ਦੇ ਖਿਲਾਫ ਹਾਂ ਜੋ ਜਿਆਦਾ ਪੜੇ ਲਿਿਖਆ ਨੂੰ ਨਕਾਰ ਕੇ ਸਾਡੇ ਤੋਂ ਘੱਟ ਪੜੇ ਲਿਿਖਆ ਨੂੰ ਮੌਕਾ ਦੇ ਰਹੀ ਹੈ। ਉਨ੍ਹਾਂ ਕਿਹਾ ਕਿ ਪਹਿਲ ਦੇ ਅਧਾਰ 'ਤੇ ਪਹਿਲਾਂ ਸਾਨੂੰ ਮੌਕਾ ਦੇ ਕੇ ਸਰਕਾਰ ਉਸ ਤੋਂ ਬਾਅਦ ਜਿਸ ਵੀ ਵਿੱਦਿਅਕ ਯੋਗਤਾ 'ਤੇ ਕਿਸੇ ਨੂੰ ਸਹਾਇਕ ਲਾਈਨਮੈਨ ਰੱਖੇ ਸਾਨੂੰ ਕੋਈ ਇਤਰਾਜ ਨਹੀਂ। ਉਨ੍ਹਾਂ ਕਿਹਾ ਕਿ ਅਸੀਂ ਅਪਣੀਆਂ ਮੰਗਾਂ ਮਨਵਾਉਣ ਲਈ ਕਿਸੇ ਵੀ ਹੱਦ ਤੱਕ ਜਾ ਸਕਦੇ ਹਾਂ ਜਿਸਦੇ ਲਈ ਪੰਜਾਬ ਸਰਕਾਰ ਅਤੇ ਬਿਜਲੀ ਨਿਗਮ ਦੀ ਮੈਨੇਜਮੈਂਟ ਜਿੰਮੇਵਾਰ ਹੋਵੇਗੀ।

   ਸਮੱਰਥਨ 'ਚ ਆਈਆਂ ਜੱਥੇਬੰਦੀਆਂ ਚੋਂ ਪੀਐਸਈਬੀ ਇੰਪਲਾਈਜ ਫੈਡਰੇਸ਼ਨ ਏਟਕ ਦੇ ਆਗੂਆਂ ਸਤੀਸ਼ ਭਾਰਦਵਾਜ, ਸੋਬਨ ਸਿੰਘ ਠਾਕੁਰ, ਭਿੰਦਰ ਸਿੰਘ ਚਹਿਲ ਅਤੇ ਗੁਰਪ੍ਰੀਤ ਸਿੰਘ ਮਹਿਦੂਦਾਂ ਨੇ ਕਿਹਾ ਕਿ ਉਹ ਆਈਟੀਆਈ ਵਾਲੀ ਵਿੱਦਿਅਕ ਯੋਗਤਾ ਵਾਲੇ ਨੌਜਵਾਨਾਂ ਨੂੰ ਸਹਾਇਕ ਲਾਈਨਮੈਨਾਂ ਨੂੰ ਰੱਖਣ ਦੇ ਵਿਰੋਧ 'ਚ ਨਹੀਂ ਬਲਕਿ ਏਹ ਭਰਤੀ ਤਾਂ ਸਾਡੇ ਸਾਂਝੇ ਥੜੇ ਦੇ ਕੀਤੇ ਸੰਘਰਸ਼ ਦੀ ਉੱਪਜ ਹੈ। ਸਾਡੀ ਮੰਗ ਤਾਂ ਆਈਟੀਆਈ ਤੋਂ ਬਾਅਦ ਅਪ੍ਰੈਂਟਸ਼ਿਪ ਕਰਕੇ ਕਈ ਕਈ ਵਾਰ ਟੈਸਟ ਪਾਸ ਚੁੱਕੇ ਨੌਜਵਾਨਾਂ ਨੂੰ ਪਹਿਲ ਦੇ ਆਧਾਰ ਤੇ ਸਿੱਧੇ ਬਿਜਲੀ ਨਿਗਮ 'ਚ ਲੈਣ ਦੀ ਹੈ, ਆਈਟੀਆਈ ਤੋਂ ਅਪ੍ਰੈਂਟਸ਼ਿਪ ਕਰ ਚੁੱਕੇ ਨੌਜਵਾਨਾਂ ਨੂੰ ਬਿਨ੍ਹਾਂ ਕੋਈ ਨਵਾਂ ਟੈਸਟ ਲਏ ਬਿਜਲੀ ਨਿਗਮ 'ਚ ਸਹਾਇਕ ਲਾਈਨਮੈਨ ਰੱਖਣ ਦੀ ਹੈ। ਸਾਡੀ ਮੰਗ ਤਾਂ ਧਰਨੇ 'ਚ ਹਜਾਰਾਂ ਦੀ ਗਿਣਤੀ 'ਚ ਪੁੱਜੇ ਅਪ੍ਰੈਂਟਸ਼ਿਪ ਕਰ ਰਹੇ ਨੌਜਵਾਨਾਂ ਨੂੰ 6 ਮਹੀਨੇ ਪੂਰੇ ਹੋਣ 'ਤੇ ਬਿਜਲੀ ਨਿਗਮ 'ਚ ਰੈਗੂਲਰ ਕਰਨ ਦੀ ਹੈ। ਉਨ੍ਹਾਂ ਕਿਹਾ ਕਿ ਏਨ੍ਹਾਂ ਨੌਜਵਾਨਾਂ ਨੂੰ ਭਰਤੀ ਕਰਨ ਤੋਂ ਬਾਅਦ ਪੰਜਾਬ ਸਰਕਾਰ ਤੇ ਮੈਨੇਜਮੈਂਟ ਆਈਟੀਆਈ ਦੇ ਅਧਾਰ 'ਤੇ ਲਾਜਮੀਂ ਪੰਜਾਬੀ 'ਤੇ ਪੰਜਾਬ ਦਾ ਵਸਨੀਕ ਹੋਣ ਦੀ ਸ਼ਰਤ 'ਤੇ ਨੌਜਵਾਨਾਂ ਨੂੰ ਰੁਜਗਾਰ ਦੇਵੇ ਸਾਨੂੰ ਕੋਈ ਇਤਰਾਜ ਨਹੀਂ ਹੋਵੇਗਾ।

ਮੀਟਿੰਗ ਬੇਸਿੱਟਾ ਰਹਿਣ ਦੇ ਰੋਸ 'ਚ 9 ਤੋਂ ਲੱਗੇਗਾ ਬਿਜਲੀ ਨਿਗਮ ਦੇ ਮੁੱਖ ਦਫਤਰ ਬਾਹਰ ਅਣਮਿੱਥੇ ਸਮੇਂ ਪੱਕਾ ਧਰਨਾ

ਨੌਕਰੀ ਲੈਣੀ ਆ ਤਾਂ ਐਪਰੈਂਟਸ਼ਿਪ ਪਾਸ ਤੇ ਕਰ ਰਹੇ ਸਾਥੀ 9 ਅਪ੍ਰੈਲ ਨੂੰ ਪਟਿਆਲਾ ਪਹੁੰਚੋ : ਪ੍ਰਧਾਨ ਸੁਰਿੰਦਰ ਸਿੰਘ ਜਲਾਲਾਬਾਦ

    ਪਟਿਆਲਾ 7 ਅਪ੍ਰੈਲ (ਹਰਸ਼ਦੀਪ ਸਿੰਘ ਮਹਿਦੂਦਾਂ, ਸੋਨੀ ਭੜੋਅ) ਪੰਜਾਬ ਸਰਕਾਰ ਵੱਲੋਂ ਬਿਜਲੀ ਨਿਗਮ ਵਿੱਚ ਲਿਆਂਦੇ ਗਏ ਸੋਧ ਬਿੱਲ, ਜਿਸ ਰਾਹੀਂ ਅਪਰੈਂਟਸ਼ਿਪ ਲਾਜ਼ਮੀ ਨੂੰ ਖਤਮ ਕਰਕੇ ਆਈਟੀਆਈ ਪਾਸ ਦੀ ਸਹਾਇਕ ਲਾਈਨ ਮੈਨ ਦੀ ਸਿੱਧੀ ਭਰਤੀ ਲਿਆਂਦੀ ਜਾ ਰਹੀ ਹੈ ਜਿਸਦਾ ਅਪਰੈਂਟਸ਼ਿਪ ਕਰ ਰਹੇ 2600 ਸਿਖਿਆਰਥੀਆਂ ਵੱਲੋਂ ਸਖਤ ਵਿਰੋਧ ਕਰਨਾ ਸ਼ੁਰੂ ਕਰ ਦਿੱਤਾ ਗਿਆ ਹੈ। ਉਨ੍ਹਾਂ ਇਸਦੀ ਵਾਪਸੀ ਲਈ ਪਟਿਆਲਾ ਵਿਖੇ ਅੱਜ ਬਿਜਲੀ ਨਿਗਮ ਦੀ ਮੈਨੇਜਮੈਂਟ ਨਾਲ ਇੱਕ ਮੀਟਿੰਗ ਰੱਖੀ ਸੀ ਜਿਸ ਵਿੱਚ ਪੁੱਜੇ ਕਮੇਟੀ ਮੈਂਬਰਾਂ ਵੱਲੋਂ ਮੀਟਿੰਗ ਦਾ ਕੋਈ ਸਿੱਟਾ ਨਾ ਨਿਕਲਣ 'ਤੇ 9 ਅਪ੍ਰੈਲ ਨੂੰ ਅਣਮਿਥੇ ਸਮੇਂ ਲਈ ਪੱਕੇ ਧਰਨੇ ਦਾ ਐਲਾਨ ਕਰ ਦਿੱਤਾ। ਸੂਬਾ ਪ੍ਰਧਾਨ ਸੁਰਿੰਦਰ ਸਿੰਘ ਜਲਾਲਾਬਾਦ ਦੀ ਅਗਵਾਈ ਹੇਠ ਇੱਕ ਵਫਦ ਨੇ ਆਈ. ਏ. ਆਰ ਰਣਵੀਰ ਸਿੰਘ ਨਾਲ ਮੁਲਾਕਾਤ ਕੀਤੀ ਅਤੇ ਸੀ ਐਮ ਡੀ ਪਟਿਆਲਾ ਨੂੰ ਮੰਗ ਪੱਤਰ ਦਿੱਤਾ।

   ਪ੍ਰਧਾਨ ਸੁਰਿੰਦਰ ਸਿੰਘ, ਉਪ ਪ੍ਰਧਾਨ ਸਤਨਾਮ ਸਿੰਘ, ਸਕੱਤਰ  ਫਤਿਹ ਸਿੰਘ, ਖਜਾਨਚੀ ਮਨਪ੍ਰੀਤ ਸਿੰਘ, ਜਗਤਾਰ ਸਿੰਘ ਨੇ ਪੱਤਰਕਾਰਾਂ ਨਾਲ ਗੱਲ ਕਰਦਿਆਂ ਕਿਹਾ ਕਿ ਬਿਜਲੀ ਨਿਗਮ 'ਚ ਅਪਰੈਂਟਸ਼ਿਪ ਟ੍ਰੇਨਿੰਗ ਕਰ ਰਹੇ 2600, ਇਸਤੋਂ ਪਹਿਲਾਂ ਕਰ ਚੁੱਕੇ ਜਾਂ ਉਸ ਤੋਂ ਵੀ ਪਹਿਲਾਂ ਸਹਾਇਕ ਲਾਈਨਮੈਨ ਦਾ ਟੈਸਟ ਤੱਕ ਪਾਸ ਕਰ ਚੁੱਕੇ ਸਾਥੀਆਂ ਨੂੰ ਪਹਿਲ ਦੇ ਆਧਾਰ 'ਤੇ ਰੁਜਗਾਰ ਦਿਵਾਉਣ ਲਈ ਬਜਿੱਦ ਹਾਂ ਤੇ ਏਨ੍ਹਾਂ ਨੂੰ ਅਪਰੈਂਟਸ਼ਿਪ ਦੀ ਯੋਗਤਾ ਦੇ ਅਧਾਰ 'ਤੇ ਰੁਜਗਾਰ ਦੁਆ ਕੇ ਰਹਾਂਗੇ।

   ਉਨ੍ਹਾਂ ਕਿਹਾ ਕਿ ਬੀਤੇ ਦਿਨ ਬਿਜਲੀ ਨਿਗਮ ਦੀ ਮੈਨੇਜਮੈਂਟ ਵੱਲੋਂ ਜਾਰੀ ਕੀਤੇ ਉਸ ਨੋਟੀਫਿਕੇਸ਼ਨ ਦਾ ਵਿਰੋਧ ਕਰਦੇ ਆ ਜਿਸ ਰਾਹੀਂ ਏਨ੍ਹਾਂ ਨੇ ਅਪਰੈਂਟਸ਼ਿਪ ਦੀ ਸ਼ਰਤ ਅਤੇ ਲਾਜਮੀਂ ਪੰਜਾਬੀ ਦੀ ਸ਼ਰਤ ਨੂੰ ਖਤਮ ਕਰਕੇ ਆਈਟੀਆਈ ਪਾਸ ਉਮੀਦਵਾਰਾਂ ਨੂੰ ਨੌਕਰੀ ਦੇਣ ਦੀ ਗੱਲ ਕੀਤੀ ਸੀ। ਉਨ੍ਹਾਂ ਕਿਹਾ ਕਿ ਬਿਜਲੀ ਨਿਗਮ ਆਈਟੀਆਈ ਪਾਸ ਨੂੰ ਨੌਕਰੀ ਦੇਣੀ ਸ਼ੁਰੂ ਕਰੇ ਪਰ ਉਸਤੋਂ ਪਹਿਲਾਂ ਜਿੰਨੇ ਵੀ ਸਿੱਖਿਆਰਥੀਆਂ ਨੇ ਲਾਈਨਮੈਨ ਦੀ ਅਪਰੈਂਟਸ਼ਿਪ ਕੀਤੀ ਹੋਈ ਹੈ ਉਨ੍ਹਾਂ ਨੂੰ ਤੁਰੰਤ ਨੌਕਰੀ ਦਿੱਤੀ ਜਾਵੇ ਤੇ ਹੁਣ ਅਪਰੈਂਟਸ਼ਿਪ ਕਰ ਰਹੇ 2600 ਸਿੱਖਿਆਰਥੀਆਂ ਨੂੰ ਛੇ ਮਹੀਨੇ ਦਾ ਸਮਾਂ ਪੂਰਾ ਹੋਣ ਦੇ ਤੁਰੰਤ ਬਾਅਦ ਬਿਜਲੀ ਨਿਗਮ 'ਚ ਰੈਗੂਲਰ ਮੁਲਾਜਮ ਵਜੋਂ ਰੱਖਿਆ ਜਾਵੇ।

   ਉਨ੍ਹਾਂ ਜੋਰ ਦੇ ਕੇ ਕਿਹਾ ਕਿ ਸਰਕਾਰ ਦੇ ਅਜਿਹੇ ਫੈਸਲਿਆਂ ਨਾਲ ਪੰਜਾਬ ਦਾ ਰੁਜਗਾਰ ਬਾਹਰਲੇ ਸੂਬਿਆਂ ਨੂੰ ਜਾ ਰਿਹਾ ਜਿਸ ਵੱਲ ਪੰਜਾਬ ਦੇ ਮੁੱਖ ਮੰਤਰੀ ਸ੍ਰ ਭਗਵੰਤ ਸਿੰਘ ਮਾਨ ਧਿਆਨ ਦੇਣ ਅਤੇ ਹੋਰਨਾਂ ਸੂਬਿਆਂ ਦੀ ਤਰਜ 'ਤੇ ਪੰਜਾਬ ਸਰਕਾਰ ਵੀ ਨੌਕਰੀਆਂ ਵਿੱਚ ਬਾਹਰਲੇ ਸੂਬਿਆਂ ਲਈ ਸੀਮਤ ਕੋਟਾ ਨਿਰਧਾਰਿਤ ਕਰੇ।

   ਪ੍ਰਧਾਨ ਸੁਰਿੰਦਰ ਸਿੰਘ ਜਲਾਲਾਬਾਦ ਨੇ ਅਪ੍ਰੈਂਟਸ਼ਿਪ ਸਿਖਿਆਰਥੀਆਂ ਨੂੰ 9 ਅਪ੍ਰੈਲ ਨੂੰ ਪਟਿਆਲਾ ਪਹੁੰਚਣ ਦੀ ਅਪੀਲ ਕਰਦਿਆਂ ਕਿਹਾ ਕਿ ਜੇਕਰ ਅਪ੍ਰੈਂਟਸ਼ਿਪ ਪੂਰੀ ਗਿਣਤੀ 'ਚ 9 ਨੂੰ ਦਿੱਤੇ ਸੰਘਰਸ਼ 'ਚ ਪਰਿਵਾਰਾਂ ਸਮੇਤ ਕੁੱਦ ਪਏ ਤਾਂ ਹੋ ਸਕਦਾ ਕਿ ਉਹ ਉਸੇ ਦਿਨ ਨਿਯੁਕਤੀ ਪੱਤਰ ਪ੍ਰਾਪਤ ਕਰਕੇ ਘਰਾਂ ਨੂੰ ਮੁੜਨ। ਉਨ੍ਹਾਂ ਸਾਫ ਕੀਤਾ ਕਿ ਅਪਣਾ ਰੁਜਗਾਰ ਲੈਣ ਲਈ ਐਪਰੈਂਟਸ਼ਿਪ ਯੂਨੀਅਨ ਕਿਸੇ ਵੀ ਹੱਦ ਤੱਕ ਜਾ ਸਕਦੀ ਹੈ।

ਪਤੀ ਤੇ ਗੱਡੀ ਚੜਾ ਕੇ ਮਾਰਨ ਦੀ ਕੋਸ਼ਿਸ਼ ਕਰਨ ਵਾਲੀ ਪੁਲਿਸ ਮੁਲਾਜਮ ਪਤਨੀ ਅਤੇ ਉਸਦੇ ਆਸ਼ਿਕ ਦੀ ਗਿ੍ਫ਼ਤਾਰੀ ਦੀ ਕੀਤੀ ਮੰਗ

ਪੀਐਸਈਬੀ ਇੰਪਲਾਈਜ ਫੈਡਰੇਸ਼ਨ ਏਟਕ ਦੇ ਵਫਦ ਨੇ ਡੀਆਈਜੀ ਨੂੰ ਸ਼ਿਕਾਇਤ ਦੇਕੇ ਧਾਰਾਵਾਂ ਚ ਹੋਰ ਵਾਧਾ ਕਰਨ ਦੀ ਕੀਤੀ ਮੰਗ

  ਲੁਧਿਆਣਾ, ਰਾਏਕੋਟ 6 ਅਪ੍ਰੈਲ (ਹਰਸ਼ਦੀਪ ਸਿੰਘ ਮਹਿਦੂਦਾਂ, ਹਾਕਮ ਸਿੰਘ ਧਾਲੀਵਾਲ) ਡੀਆਈਜੀ ਲੁਧਿਆਣਾ ਰੇਂਜ ਸ੍ਰ ਸਤਿੰਦਰ ਸਿੰਘ ਜੀ ਨੂੰ ਪੀਐਸਈਬੀ ਇੰਪਲਾਈਜ ਫੈਡਰੇਸ਼ਨ ਏਟਕ ਦਾ ਇੱਕ ਵਫਦ ਮਿਲਿਆ, ਜਿਸ ਵਿੱਚ ਸੂਬਾ ਡਿਪਟੀ ਜਨਰਲ ਸਕੱਤਰ ਰਸ਼ਪਾਲ ਸਿੰਘ ਪਾਲੀ, ਲੁਧਿਆਣਾ ਜੋਨ ਦੇ ਮੀਡੀਆ ਪ੍ਰਚਾਰਕ ਤੇ ਸਰਕਲ ਪੂਰਬੀ ਦੇ ਪ੍ਰਧਾਨ ਗੁਰਪ੍ਰੀਤ ਸਿੰਘ ਮਹਿਦੂਦਾਂ, ਜੋਨ ਕੋਆਰਡੀਨੇਟਰ ਤੇ ਸਰਕਲ ਪੱਛਮੀਂ ਦੇ ਪ੍ਰਧਾਨ ਗੁਰਮੁੱਖ ਸਿੰਘ, ਦੋਵਾਂ ਸਰਕਲਾਂ ਦੇ ਸਕੱਤਰ ਰਘਵੀਰ ਸਿੰਘ ਜਮਾਲਪੁਰ ਤੇ ਦਵਿੰਦਰ ਸਿੰਘ ਅਤੇ ਸੀਨੀਅਰ ਆਗੂ ਕੇਵਲ ਸਿੰਘ ਸ਼ਾਮਿਲ ਸਨ। ਵਫਦ ਨੇ ਡੀਆਈਜੀ ਨੂੰ ਬਿਜਲੀ ਮੁਲਾਜ਼ਮ ਪਰਮਿੰਦਰ ਸਿੰਘ ਉੱਤੇ ਉਸਦੀ ਪਤਨੀ ਅਤੇ ਉਸਦੇ ਆਸ਼ਿਕ ਵੱਲੋਂ ਸਕਾਰਪੀਓ ਚੜਾਉਣ ਵਾਲੇ ਮਾਮਲੇ ਤੋਂ ਜਾਣੂ ਕਰਵਾਇਆ। ਭਾਵੇਂ ਕਿ ਪੀਐਸਈਬੀ ਇੰਪਲਾਈਜ ਫੈਡਰੇਸ਼ਨ ਏਟਕ ਦੇ ਯਤਨਾਂ ਸਦਕਾ ਪਰਸੋਂ ਰਾਤ ਹੀ ਮੁੱਲਾਂਪੁਰ ਥਾਣੇ ਚ ਸੰਗੀਨ ਧਾਰਾਵਾਂ 110, 118(1), 115(2), 351(2), 3(5) ਤਹਿਤ ਮੁਕੱਦਮਾ ਨੰ: 71 ਦਰਜ ਕਰ ਲਿਆ ਗਿਆ ਸੀ ਪਰ ਦੋਵੇਂ ਅਰੋਪੀ ਪੁਲਿਸ ਮੁਲਾਜ਼ਮ ਹੋਣ ਕਿਤੇ ਨਾ ਕਿਤੇ ਪੁਲਿਸ ਵੱਲੋਂ ਉਨ੍ਹਾਂ ਦਾ ਬਚਾਓ ਕਰਨ ਦੀ ਕੋਸ਼ਿਸ਼ ਤਹਿਤ ਰਾਏਕੋਟ ਸਿਵਲ ਹਸਪਤਾਲ ਵਿੱਚ ਜੇਰੇ ਇਲਾਜ ਪਰਮਿੰਦਰ ਸਿੰਘ ਦੇ ਬਿਆਨਾਂ ਨੂੰ ਤੋੜ ਮਰੋੜ ਕੇ ਲਿਖਿਆ ਗਿਆ ਸੀ। ਉਸ ਦੀਆਂ ਕਮੀਆਂ ਡੀਆਈਜੀ ਅੱਗੇ ਰੱਖ ਕੇ ਦਰਜ ਮੁਕੱਦਮੇਂ ਦੀਆਂ ਧਾਰਾਵਾ 'ਚ ਹੋਰ ਵਾਧੇ, ਪਰਮਿੰਦਰ ਸਿੰਘ ਤੇ ਉਸਦੇ ਪਰਿਵਾਰ ਨੂੰ ਸਿਵਲ ਹਸਪਤਾਲ ਵਿੱਚ ਆਕੇ ਧਮਕਾਉਣ ਵਾਲੇ ਦੋ ਵਿਆਕਤੀਆਂ ਨੂੰ ਏਸੇ ਮੁਕੱਦਮੇਂ ਚ ਨਾਮਜਦ ਕਰਨ ਤੋਂ ਇਲਾਵਾ ਅਰੋਪੀ ਪਤਨੀ ਤੇ ਉਸਦੇ ਆਸ਼ਿਕ ਦੀ ਫੌਰੀ ਗਿ੍ਫ਼ਤਾਰੀ ਦੀ ਮੰਗ ਵੀ ਕੀਤੀ ਗਈ। ਜੱਥੇਬੰਦੀ ਦੇ ਪ੍ਰਭਾਵ ਹੇਠ ਡੀਆਈਜੀ ਵੱਲੋਂ ਜਿੱਥੇ ਉਸੇ ਵੇਲੇ ਐਸ ਐਸ ਪੀ ਜਗਰਾਉਂ ਨੂੰ ਹੋਰ ਲੋੜੀਂਦੀ ਕਾਰਵਾਈ ਅਮਲ ਵਿੱਚ ਲਿਆਉਣ ਲਈ ਕਿਹਾ ਗਿਆ ਉੱਥੇ ਹੀ ਯੂਨੀਅਨ ਵੱਲੋਂ ਅਪਣੇ ਲੈਟਰ ਹੈੱਡ ਉੱਤੇ ਦਿੱਤੀ ਸ਼ਿਕਾਇਤ ਨੂੰ ਤੁਰੰਤ ਮਾਰਕ ਕਰਕੇ ਹੱਥੋ ਹੱਥੀ ਐਸ ਐਸ ਪੀ ਸਾਹਿਬ ਨੂੰ ਦੇਣ ਲਈ ਵੀ ਦਿੱਤਾ ਗਿਆ। ਇਸ ਮੌਕੇ ਰਸ਼ਪਾਲ ਸਿੰਘ ਪਾਲੀ ਅਤੇ ਗੁਰਪ੍ਰੀਤ ਸਿੰਘ ਮਹਿਦੂਦਾਂ ਨੇ ਦੱਸਿਆ ਕਿ ਪੀਐਸਈਬੀ ਇੰਪਲਾਈਜ ਫੈਡਰੇਸ਼ਨ ਏਟਕ ਕਿਸੇ ਵੀ ਕੀਮਤ ਤੇ ਦੋਸ਼ੀਆਂ ਨੂੰ ਬਚਣ ਨਹੀਂ ਦੇਵੇਗੀ ਭਾਵੇਂ ਪੁਲਿਸ ਮੁਲਾਜਮ ਕਿੰਨੀ ਵੀ ਉੱਚੀ ਪਹੁੰਚ ਕਿਉਂ ਨਾ ਰੱਖਦੇ ਹੋਣ। ਉਨ੍ਹਾਂ ਏਹ ਵੀ ਦੱਸਿਆ ਕਿ ਸਿਵਲ ਹਸਪਤਾਲ ਰਾਏਕੋਟ ਵਿਖੇ ਧਮਕਾਉਣ ਆਏ ਦੋਵੇਂ ਵਿਆਕਤੀ ਖੁਦ ਨੂੰ ਅਰੋਪੀ ਅਸ਼ਿਕ ਦੇ ਰਿਸ਼ਤੇਦਾਰ ਦੱਸਦੇ ਸਨ। ਉਨ੍ਹਾਂ ਨੇ ਪਰਮਿੰਦਰ ਸਿੰਘ ਨੂੰ ਉਸਦੀ ਪਤਨੀ ਦੇ ਆਸ਼ਿਕ ਨੂੰ ਮੁਕੱਦਮੇ ਚੋਂ ਬਾਹਰ ਕੱਢਣ ਲਈ ਧਮਕਾਇਆ ਸੀ।  ਸ੍ ਪਾਲੀ ਤੇ ਮਹਿਦੂਦਾਂ ਨੇ ਸਾਫ ਕੀਤਾ ਕਿ ਜੇਕਰ ਜਲਦ ਦੋਸ਼ੀਆਂ ਨੂੰ ਗਿਰਫ਼ਤਾਰ ਨਾ ਕੀਤਾ ਗਿਆ ਤਾਂ ਉਹ ਪੁਲਿਸ ਖਿਲਾਫ਼ ਤਿੱਖਾ ਸੰਘਰਸ਼ ਵਿੱਢਣ ਲਈ ਮਜਬੂਰ ਹੋਣਗੇ ਜਿਸਦੀ ਸਾਰੀ ਜਿੰਮੇਵਾਰੀ ਪੰਜਾਬ ਪੁਲਿਸ ਦੀ ਹੋਵੇਗੀ। ਉਨ੍ਹਾਂ ਅਰੋਪੀਆਂ ਤੋਂ ਪਰਮਿੰਦਰ ਸਿੰਘ ਅਤੇ ਉਸਦੇ ਪਰਿਵਾਰ ਨੂੰ ਖਤਰਾ ਹੋਣ ਦੀ ਗੱਲ ਵੀ ਆਖੀ।

2600 ਐਪਰੈਂਟਸ਼ਿਪ ਯੂਨੀਅਨ ਵੱਲੋਂ ਬਿਜਲੀ ਮੰਤਰੀ ਅਰੋੜਾ, ਮੰਤਰੀ ਮੁੰਡੀਆ ਤੇ ਵਿਧਾਇਕ ਗਰੇਵਾਲ ਨੂੰ ਮੰਗ ਪੱਤਰ

 

ਐਪਰੈਂਟਸ਼ਿਪ ਕਰ ਚੁੱਕੇ ਤੇ ਕਰ ਰਹੇ ਸਿਿਖਆਰਥੀਆਂ ਨੂੰ ਪਹਿਲ ਦੇ ਅਧਾਰ ਤੇ ਸਹਾਇਕ ਲਾਈਨਮੈਨ ਰੱਖਣ ਦੀ ਕੀਤੀ ਮੰਗ

  ਲੁਧਿਆਣਾ 5 ਅਪ੍ਰੈਲ (ਹਰਸ਼ਦੀਪ ਸਿੰਘ ਮਹਿਦੂਦਾਂ, ਸੁਰਿੰਦਰ ਸ਼ਿੰਦਾ) ਬੀਤੇ ਦਿਨੀਂ ਲੁਧਿਆਣਾ ਦੇ ਰੱਖ ਬਾਗ 'ਚ 2000 ਦਾ ਵੱਡਾ ਇੱਕਠ ਕਰਕੇ 2600 ਐਪਰੈਂਟਸ਼ਿਪ ਯੂਨੀਅਨ ਨੇ ਭਾਵੇਂ ਪੰਜਾਬ ਸਰਕਾਰ ਅਤੇ ਬਿਜਲੀ ਨਿਗਮ ਨੂੰ ਲਾਜਮੀਂ ਪੰਜਾਬੀ ਦੀ ਸ਼ਰਤ ਨੂੰ ਮੁੜ ਤੋਂ ਬਹਾਲ ਕਰਨ ਲਈ ਮਜਬੂਰ ਕਰ ਦਿੱਤਾ ਪਰ ਉਨ੍ਹਾਂ ਦੀ ਪਹਿਲ ਦੇ ਅਧਾਰ 'ਤੇ ਭਰਤੀ ਦੀ ਕੀਤੀ ਮੰਗ ਬਾਰੇ ਪੰਜਾਬ ਸਰਕਾਰ ਅਤੇ ਬਿਜਲੀ ਨਿਗਮ ਦੀ ਮੈਨੇਜਮੈਂਟ ਵੱਲੋਂ ਕੋਈ ਵੀ ਤਸੱਲੀਬਖਸ਼ ਜਵਾਬ ਨਾ ਮਿਲਣ ਤੋਂ ਗੁਸਾਈ ਲਾਈਨਮੈਨਾਂ ਨੇ ਪੰਜਾਬ ਭਰ 'ਚ ਸੱਤਾਧਾਰੀ ਦੇ ਵਿਧਾਇਕਾਂ ਅਤੁ ਮੰਤਰੀਆਂ ਨੂੰ ਮੰਗ ਪੱਤਰ ਦਿੱਤੇ। ਲੁਧਿਆਣਾ ਉਚੇਚੇ ਤੌਰ 'ਤੇ ਪਹੁੰਚੇ 2600 ਐਪਰੈਂਟਸ਼ਿਪ ਪਾਸ ਯੂਨੀਅਨ ਦੇ ਸੂਬਾ ਪ੍ਰਧਾਨ ਸੁਰਿੰਦਰ ਸਿੰਘ ਜਲਾਲਾਬਾਦ, ਫਤਹਿ ਸਿੰਘ, ਸੋਨੂੰ ਕੁਮਾਰ ਤੋਂ ਇਲਾਵਾ ਪੀਐਸਈਬੀ ਇੰਪਲਾਈਜ ਫੈਡਰੇਸ਼ਨ ਏਟਕ ਦੇ ਜੋਨ ਮੀਡੀਆ ਪ੍ਰਚਾਰਕ ਤੇ ਸਰਕਲ ਪੂਰਬੀ ਦੇ ਪ੍ਰਧਾਨ ਗੁਰਪ੍ਰੀਤ ਸਿੰਘ ਮਹਿਦੂਦਾਂ, ਸਕੱਤਰ ਰਘਵੀਰ ਸਿੰਘ ਨੂੰ ਨਾਲ ਲੈਕੇ ਬਿਜਲੀ ਮੰਤਰੀ ਸੰਜੀਵ ਅਰੋੜਾ ਦੀ ਗੈਰਮੌਜੂਦਗੀ 'ਚ ਉਨ੍ਹਾਂ ਦੀ ਦਫਤਰ ਇੰਚਾਰਜ ਨੀਨਾ ਨੂੰ, ਕੈਬਨਿਟ ਮੰਤਰੀ ਹਰਦੀਪ ਸਿੰਘ ਮੁੰਡੀਆਂ ਅਤੇ ਵਿਧਾਇਕ ਦਲਜੀਤ ਸਿੰਘ ਭੋਲਾ ਗਰੇਵਾਲ ਨੂੰ ਉਨ੍ਹਾਂ ਦੀ ਰਿਹਾਇਸ ਪਹੁੰਚ ਕੇ ਮੰਗ ਪੱਤਰ ਦਿੱਤਾ। ਜਿਸ ਬਾਰੇ ਗੱਲ ਕਰਦਿਆਂ ਪ੍ਰਧਾਨ ਸੁਰਿੰਦਰ ਸਿੰਘ ਜਲਾਲਾਬਾਦ ਨੇ ਦੱਸਿਆ ਕਿ ਅਸੀਂ ਲਾਈਨਮੈਨ ਦੀ ਅਪ੍ਰੈਂਟਸ਼ਿਪ ਕਰ ਰਹੇ 2600 ਸਿਿਖਆਰਥੀਆਂ ਤੋਂ ਇਲਾਵਾ ਇਸਤੋਂ ਪਹਿਲਾਂ ਅਪ੍ਰੈਂਟਸ਼ਿਪ ਕਰੀ ਬੈਠੇ 16 ਲਾਈਨਮੈਨਾਂ ਨੂੰ ਬਿਜਲੀ ਨਿਗਮ 'ਚ ਸਿੱਧਾ ਭਰਤੀ ਚਾਹੁੰਦੇ ਹਾਂ। ਕਿਉਂਕਿ ਪੰਜਾਬ ਸਰਕਾਰ ਤੇ ਬਿਜਲੀ ਨਿਗਮ ਦੀ ਮੈਨੇਜਮੈਂਟ ਨੇ ਬੀਤੇ ਦਿਨੀਂ 6000 ਸਹਾਇਕ ਲਾਈਨਮੈਨਾਂ ਦੀ ਭਰਤੀ ਆਈਟੀਆਈ ਪੱਧਰ ਦੀ ਵਿੱਦਿਆਕ ਯੋਗਤਾ ਦੇ ਆਧਾਰ 'ਤੇ ਸਹਾਇਕ ਲਾਈਨਮੈਨ ਰੱਖਣ ਦਾ ਨੋਟੀਫਿਕੇਸ਼ਨ ਜਾਰੀ ਕੀਤਾ ਸੀ ਜਿਸਦਾ ਸਾਡੇ ਵੱਲੋਂ ਦੋ ਤਰਕਾਂ ਦੇ ਆਧਾਰ 'ਤੇ ਵਿਰੋਧ ਕੀਤਾ ਗਿਆ ਸੀ। ਇੱਕ ਲਾਜਮੀਂ ਪੰਜਾਬੀ ਤੇ ਦੂਜਾ ਲਾਈਨਮੈਨ ਦੀ ਅਪ੍ਰੈਂਟਸ਼ਿਪ ਨੂੰ ਖਤਮ ਕਰ ਦਿੱਤਾ ਸੀ। ਦੋਵਾਂ ਨਾਲ ਬਾਹਰੀ ਰਾਜਾਂ ਦੇ ਲੋਕਾਂ ਨੂੰ ਲਾਭ ਮਿਲ ਜਾਣਾ ਸੀ ਜਦਕਿ ਬੇਰੁਜਗਾਰੀ ਦੀ ਮਾਰ ਝੱਲ ਰਹੇ ਪੰਜਾਬ ਦੇ ਨੌਜਵਾਨ ਰੁਜਗਾਰ ਤੋਂ ਵਾਂਝੇ ਹੋ ਜਾਣੇ ਸਨ। ਸਾਡੇ ਵੱਲੋਂ ਵਿਰੋਧ ਕਰਨ 'ਤੇ ਲਾਜਮੀਂ ਪੰਜਾਬੀ ਦੀ ਸ਼ਰਤ ਨੂੰ ਤਾਂ ਲਾਗੂ ਕਰ ਦਿੱਤਾ ਗਿਆ ਪਰ ਅਪ੍ਰੈਂਟਸ਼ਿਪ ਕਰ ਚੁੱਕੇ ਤੇ ਕਰ ਰਹੇ ਸਿਿਖਆਰਤੀਆਂ ਨੂੰ ਕੋਈ ਰਾਹਤ ਨਹੀਂ ਦਿੱਤੀ ਗਈ। ਇਸ ਲਈ ਅਸੀਂ ਮੰਗ ਕਰਦੇ ਹਾਂ ਕਿ ਸਾਨੂੰ ਜਿਆਦਾ ਵਿੱਦਿਅਕ ਯੋਗਤਾ ਹੋਣ ਕਾਰਨ ਪਹਿਲਾਂ ਰੁਜਗਾਰ ਦੇ ਕੇ ਫੇਰ ਭਾਵੇਂ ਆਈਟੀਆਈ ਪਾਸ ਸਿਿਖਆਰਥੀਆਂ ਨੂੰ ਰੱਖਣਾ ਸ਼ੁਰੂ ਕਰ ਦਿੱਤਾ ਜਾਵੇ। ਉਨ੍ਹਾਂ ਕਿਹਾ ਕਿ ਪਰ ਅਸੀਂ ਬਾਹਰਲੇ ਰਾਜਾਂ ਦੇ ਲੋਕਾਂ ਲਈ ਬਣਦਾ ਕੋਟਾ ਦੇਣ ਦੇ ਹੱਕ 'ਚ ਆ ਜਿਹੜੇ ਜਿਆਦਾ ਕੋਟੇ ਰਾਹੀਂ ਪੰਜਾਬ ਦੇ ਨੌਜਵਾਨਾਂ ਦਾ ਹੱਕ ਖਾਹ ਰਹੇ ਹਨ। ਉਨ੍ਹਾਂ ਕਿਹਾ ਕਿ ਜੇਕਰ ਸਾਡੀਆਂ ਮੰਗਾਂ 7 ਅਪ੍ਰੈਲ ਨੂੰ ਪਟਿਆਲਾ ਵਿਖੇ ਹੋਣ ਜਾ ਰਹੀ ਮੀਟਿੰਗ 'ਚ ਨਾ ਮੰਨਿਆ ਗਿਆ ਤਾਂ ਅਸੀਂ ਕਿਸੇ ਵੇਲੇ ਵੀ ਪਟਿਆਲਾ ਮੁੱਖ ਬਿਜਲੀ ਦਫਤਰ ਅੱਗੇ ਧਰਨਾ ਦੇਣ ਦਾ ਪ੍ਰੋਗਰਾਮ ਦੇ ਸਕਦੇ ਹਾਂ।

  ਗੁਰਪ੍ਰੀਤ ਸਿੰਘ ਮਹਿਦੂਦਾਂ ਅਤੇ ਰਘਵੀਰ ਸਿੰਘ ਜਮਾਲਪੁਰ ਨੇ ਕਿਹਾ ਏਨ੍ਹਾਂ ਨੌਜਵਾਨਾਂ ਦੀਆਂ ਮੰਗਾਂ ਬਿਲਕੁੱਲ ਜਾਇਜ ਹਨ ਅਤੇ ਅਸੀਂ ਵੀ ਪੰਜਾਬ ਸਰਕਾਰ ਤੋਂ ਮੰਗ ਕਰਦੇ ਹਾਂ ਕਿ ਜਿਆਦਾ ਵਿੱਦਿਆਕ ਯੋਗਤਾ ਵਾਲੇ ਏਨ੍ਹਾਂ ਨੌਜਵਾਨਾਂ ਪਹਿਲ ਦੇ ਆਧਾਰ 'ਤੇ ਬਿਨ੍ਹਾਂ ਕੋਈ ਹੋਰ ਟੈਸਟ ਲਏ ਰੁਜਗਾਰ ਦਿੱਤਾ ਜਾਵੇ। ਉਨ੍ਹਾਂ ਕਿਹਾ ਕਿ ਜੇਕਰ ਏਹ ਨੌਜਵਾਨ ਕਿਸੇ ਸੰਘਰਸ਼ ਦੀ ਕਾਲ ਦਿੰਦੇ ਹਨ ਤਾਂ ਪੀਐਸਈਬੀ ਇੰਪਲਾਈਜ ਫੈਡਰੇਸ਼ਨ ਏਟਕ ਏਨ੍ਹਾਂ ਨੂੰ ਹਰ ਪ੍ਰਕਾਰ ਦਾ ਸਹਿਯੋਗ ਦੇਵੇਗੀ ਅਤੇ ਏਨ੍ਹਾਂ ਤੋਂ ਵੀ ਅੱਗੇ ਹੋ ਕੇ ਸੰਵਿਧਾਨਿਕ ਤਰੀਕੇ ਨਾਲ ਸੰਘਰਸ਼ ਕਰੇਗੀ।

ਇੰਡਿਅਨ ਆਇਲ ਕਾਰਪੋਰੇਸ਼ਨ ਲਿਮਿਟੇਡ ਦੇ ਸਹਿਯੋਗ ਨਾਲ HBCH&RC ਪੰਜਾਬ ਵਿੱਚ 3T MRI ਸਕੈਨਰ ਦੀ ਸ਼ੁਰੂਆਤ

 

ਇੰਡਿਅਨ ਆਇਲ ਕਾਰਪੋਰੇਸ਼ਨ ਲਿਮਿਟੇਡ ਦੇ ਸਹਿਯੋਗ ਨਾਲ HBCH&RC ਪੰਜਾਬ ਵਿੱਚ 3T MRI ਸਕੈਨਰ ਦੀ ਸ਼ੁਰੂਆਤ

ਨਿਊ ਚੰਡੀਗੜ੍ਹ, 2 ਅਪ੍ਰੈਲ (ਗੁਰਿੰਦਰ ਕੌਰ ਮਹਿਦੂਦਾਂ): ਅਧੁਨਿਕ ਕੈਂਸਰ ਡਾਇਗਨੋਸਟਿਕ ਸਹੂਲਤਾਂ ਨੂੰ ਮਜ਼ਬੂਤੀ ਦੇਣ ਵੱਲ ਇੱਕ ਮਹੱਤਵਪੂਰਨ ਕਦਮ ਵਜੋਂ, ਮਹਾਰਤਨਾ ਪੀਐਸਯੂ ਇੰਡਿਅਨ ਆਇਲ ਕਾਰਪੋਰੇਸ਼ਨ ਲਿਮਿਟੇਡ (IOCL) ਦੇ ਸੀਨੀਅਰ ਅਧਿਕਾਰੀਆਂ ਦੀ ਟੀਮ ਨੇ 2 ਅਪ੍ਰੈਲ 2026 ਨੂੰ ਹੋਮੀ ਭਾਭਾ ਕੈਂਸਰ ਹਸਪਤਾਲ ਐਂਡ ਰਿਸਰਚ ਸੈਂਟਰ (HBCH&RC), ਨਿਊ ਚੰਡੀਗੜ੍ਹ, ਪੰਜਾਬ ਵਿੱਚ ਆਧੁਨਿਕ 3 ਟੈਸਲਾ (3T) MRI ਸਕੈਨਰ ਸਹੂਲਤ ਦਾ ਉਦਘਾਟਨ ਕੀਤਾ।

ਇਹ MRI ਸਕੈਨਰ IOCL ਦੀ ਕੋਰਪੋਰੇਟ ਸੋਸ਼ਲ ਰਿਸਪਾਂਸਬਿਲਿਟੀ (CSR) ਪਹਿਲ ਹੇਠ ਲਗਾਇਆ ਗਿਆ ਹੈ। ਇਸਦਾ ਉਦਘਾਟਨ ਬਿਭੂਤੀ ਰੰਜਨ ਪ੍ਰਧਾਨ, ਐਗਜ਼ਿਕਿਊਟਿਵ ਡਾਇਰੈਕਟਰ (ਕੋਰਪੋਰੇਟ ਕੋਆਰਡੀਨੇਸ਼ਨ ਅਤੇ CSR), ਅਤੇ ਅਸ਼ੁਤੋਸ਼ ਗੁਪਤਾ, ਐਗਜ਼ਿਕਿਊਟਿਵ ਡਾਇਰੈਕਟਰ ਅਤੇ ਸਟੇਟ ਹੈੱਡ, ਪੰਜਾਬ ਸਟੇਟ ਆਫਿਸ ਵੱਲੋਂ ਕੀਤਾ ਗਿਆ। ਇਸ ਮੌਕੇ ‘ਤੇ HBCH&RC ਪੰਜਾਬ ਦੇ ਡਾਇਰੈਕਟਰ ਡਾ. ਅਸ਼ੀਸ਼ ਗੁਲੀਆ ਵੀ ਮੌਜੂਦ ਸਨ।

ਇਸ ਮੌਕੇ ‘ਤੇ ਬੋਲਦਿਆਂ ਡਾ. ਅਸ਼ੀਸ਼ ਗੁਲੀਆ ਨੇ IOCL ਦਾ ਧੰਨਵਾਦ ਕਰਦਿਆਂ ਕਿਹਾ ਕਿ ਇਹ ਨਵੀਂ ਸਹੂਲਤ ਕੈਂਸਰ ਦੀ ਜਾਂਚ ਅਤੇ ਇਲਾਜ ਵਿੱਚ ਬਹੁਤ ਮਦਦਗਾਰ ਸਾਬਤ ਹੋਵੇਗੀ। ਉਨ੍ਹਾਂ ਦੱਸਿਆ ਕਿ ਇਸ MRI ਸਕੈਨਰ ਦੀ ਲਗਤ ਲਗਭਗ ₹16 ਕਰੋੜ ਹੈ।

 “ਜਦੋਂ IOCL ਵਰਗੀ ਅਗੇਤੀ ਸੰਸਥਾ ਆਮ ਲੋਕਾਂ ਅਤੇ ਜ਼ਰੂਰਤਮੰਦ ਕੈਂਸਰ ਮਰੀਜ਼ਾਂ ਦੀ ਭਲਾਈ ਲਈ ਸਹਿਯੋਗ ਕਰਦੀ ਹੈ ਤਾਂ ਇਹ ਸਾਡੇ ਹੌਸਲੇ ਨੂੰ ਹੋਰ ਮਜ਼ਬੂਤ ਕਰਦੀ ਹੈ। ਇਸ ਨਾਲ ਸਾਨੂੰ ਇਹ ਯਕੀਨ ਮਿਲਦਾ ਹੈ ਕਿ ਕੈਂਸਰ ਦੇ ਖ਼ਿਲਾਫ਼ ਲੜਾਈ ਵਿੱਚ ਅਸੀਂ ਇਕੱਲੇ ਨਹੀਂ ਹਾਂ। ਇਸ ਤਰ੍ਹਾਂ ਦੇ ਯੋਗਦਾਨ ਨਾਲ ਅਸੀਂ ਸੇਵਾਵਾਂ ਬਿਨਾਂ ਕਿਸੇ ਦੇਰੀ ਅਤੇ ਸਬਸਿਡੀ ਦਰਾਂ ‘ਤੇ ਮੁਹੱਈਆ ਕਰਵਾ ਸਕਦੇ ਹਾਂ।” ਉਨ੍ਹਾਂ ਨੇ ਕਿਹਾ.

ਡਾ. ਆਸ਼ੀਸ਼ ਗੁਲੀਆ ਨੇ ਇਹ ਵੀ ਦੱਸਿਆ ਕਿ ਇੰਡਿਅਨ ਆਇਲ ਦਾ ਹਸਪਤਾਲ ਨਾਲ ਲੰਬੇ ਸਮੇਂ ਤੋਂ ਸਹਿਯੋਗ ਰਿਹਾ ਹੈ ਅਤੇ ਕੰਪਨੀ ਨੇ ਹਸਪਤਾਲ ਦੇ ਕਈ ਪ੍ਰੋਜੈਕਟਾਂ ਵਿੱਚ ਸਹਾਇਤਾ ਕੀਤੀ ਹੈ।

ਬਿਭੂਤੀ ਰੰਜਨ ਪ੍ਰਧਾਨ, ਐਗਜ਼ਿਕਿਊਟਿਵ ਡਾਇਰੈਕਟਰ (ਕੋਰਪੋਰੇਟ ਕੋਆਰਡੀਨੇਸ਼ਨ ਅਤੇ CSR), IOCL ਨੇ ਕਿਹਾ, “IOCL ਵਿੱਚ ਅਸੀਂ ਮੰਨਦੇ ਹਾਂ ਕਿ ਸਿਹਤ ਸੇਵਾ ਸਮਾਜਿਕ ਜ਼ਿੰਮੇਵਾਰੀ ਦਾ ਇੱਕ ਮਹੱਤਵਪੂਰਨ ਸਤੰਭ ਹੈ। ਇਸ ਤਰ੍ਹਾਂ ਦੀਆਂ ਅਧੁਨਿਕ ਡਾਇਗਨੋਸਟਿਕ ਸਹੂਲਤਾਂ ਨੂੰ ਸਹਿਯੋਗ ਦੇਣਾ ਸਾਡੀ ਵਚਨਬੱਧਤਾ ਦਾ ਹਿੱਸਾ ਹੈ। ਅਸੀਂ ਹੋਮੀ ਭਾਭਾ ਕੈਂਸਰ ਹਸਪਤਾਲ ਨਾਲ ਭਾਈਚਾਰੇ ‘ਤੇ ਮਾਣ ਮਹਿਸੂਸ ਕਰਦੇ ਹਾਂ।”

ਅਸ਼ੁਤੋਸ਼ ਗੁਪਤਾ, ਐਗਜ਼ਿਕਿਊਟਿਵ ਡਾਇਰੈਕਟਰ ਅਤੇ ਸਟੇਟ ਹੈੱਡ, ਪੰਜਾਬ ਸਟੇਟ ਆਫਿਸ, IOCL ਨੇ ਕਿਹਾ, “ਇਹ ਪਹਿਲ ਪੰਜਾਬ ਦੇ ਲੋਕਾਂ ਪ੍ਰਤੀ IOCL ਦੀ ਵਚਨਬੱਧਤਾ ਨੂੰ ਦਰਸਾਉਂਦੀ ਹੈ। ਅਧੁਨਿਕ ਮੈਡੀਕਲ ਤਕਨਾਲੋਜੀ ਤੱਕ ਪਹੁੰਚ ਯਕੀਨੀ ਬਣਾ ਕੇ ਅਸੀਂ ਕੈਂਸਰ ਦੀ ਸ਼ੁਰੂਆਤੀ ਪਹਿਚਾਣ ਅਤੇ ਇਲਾਜ ਦੇ ਨਤੀਜਿਆਂ ਵਿੱਚ ਸੁਧਾਰ ਲਿਆਉਣ ਦਾ ਲਕਸ਼ ਰੱਖਦੇ ਹਾਂ। ਅਸੀਂ ਹਸਪਤਾਲ ਨਾਲ ਆਪਣਾ ਸਹਿਯੋਗ ਜਾਰੀ ਰੱਖਣ ਲਈ ਉਤਸੁਕ ਹਾਂ।”

3T MRI ਸਕੈਨਰ ਅੱਜ ਦੀ ਸਭ ਤੋਂ ਅਧੁਨਿਕ ਇਮੇਜਿੰਗ ਤਕਨਾਲੋਜੀਆਂ ਵਿੱਚੋਂ ਇੱਕ ਹੈ, ਜੋ ਪਰੰਪਰਾਗਤ MRI ਸਿਸਟਮਾਂ ਦੇ ਮੁਕਾਬਲੇ ਵਧੀਆ ਰੈਜ਼ੋਲੂਸ਼ਨ ਤਸਵੀਰਾਂ ਅਤੇ ਤੇਜ਼ ਸਕੈਨ ਸਮਾਂ ਪ੍ਰਦਾਨ ਕਰਦਾ ਹੈ। ਇਸ ਨਾਲ ਟਿਊਮਰ ਦੀ ਜ਼ਿਆਦਾ ਸਹੀ ਪਹਿਚਾਣ, ਬਿਮਾਰੀ ਦੀ ਪ੍ਰਗਤੀ ਦੀ ਬਿਹਤਰ ਜਾਂਚ ਅਤੇ ਕੈਂਸਰ ਇਲਾਜ ਦੀ ਯੋਜਨਾ ਬਣਾਉਣ ਵਿੱਚ ਮਦਦ ਮਿਲਦੀ ਹੈ।

 ਇਸ ਅਧੁਨਿਕ 3T MRI ਸਕੈਨਰ ਦੀ ਸਥਾਪਨਾ ਨਾਲ ਖੇਤਰ ਵਿੱਚ ਕੈਂਸਰ ਮਰੀਜ਼ਾਂ ਲਈ ਜਲਦੀ ਪਹਿਚਾਣ ਅਤੇ ਬਿਹਤਰ ਇਲਾਜ ਯੋਜਨਾ ਸੰਭਵ ਹੋਵੇਗੀ ਅਤੇ ਮਰੀਜ਼ਾਂ ਨੂੰ ਬਿਨਾਂ ਉਡੀਕ ਸਮੇਂ ਸਹੂਲਤ ਮਿਲੇਗੀ।

*HBCH&RC ਪੰਜਾਬ ਬਾਰੇ*

ਪੰਜਾਬ ਅਤੇ ਨੇੜਲੇ ਰਾਜਾਂ ਅਤੇ ਕੇਂਦਰ ਸ਼ਾਸਿਤ ਪ੍ਰਦੇਸ਼ਾਂ ਦੇ ਨਿਵਾਸੀਆਂ ਨੂੰ ਵਿਸ਼ਵ-ਪੱਧਰੀ ਕੈਂਸਰ ਇਲਾਜ ਮੁਹੱਈਆ ਕਰਵਾਉਣ ਦੇ ਉਦੇਸ਼ ਨਾਲ ਮਾਣਯੋਗ ਪ੍ਰਧਾਨ ਮੰਤਰੀ ਸ਼੍ਰੀ ਨਰਿੰਦਰ ਮੋਦੀ ਜੀ ਨੇ ਅਗਸਤ 2022 ਵਿੱਚ ਮੁੱਲਾਂਪੁਰ, ਨਿਊ ਚੰਡੀਗੜ੍ਹ (ਜ਼ਿਲ੍ਹਾ ਸਾਹਿਬਜ਼ਾਦਾ ਅਜੀਤ ਸਿੰਘ ਨਗਰ, ਮੋਹਾਲੀ) ਵਿੱਚ ‘ਹੋਮੀ ਭਾਭਾ ਕੈਂਸਰ ਹਸਪਤਾਲ ਐਂਡ ਰਿਸਰਚ ਸੈਂਟਰ’ ਨੂੰ ਦੇਸ਼ ਨੂੰ ਸਮਰਪਿਤ ਕੀਤਾ ਸੀ।ਇਹ ਹਸਪਤਾਲ ਟਾਟਾ ਮੈਮੋਰਿਯਲ ਸੈਂਟਰ, ਜੋ ਕਿ ਭਾਰਤ ਸਰਕਾਰ ਦੇ ਐਟਾਮਿਕ ਐਨਰਜੀ ਵਿਭਾਗ ਅਧੀਨ ਇੱਕ ਸਹਾਇਤਾਪ੍ਰਾਪਤ ਸੰਸਥਾ ਹੈ, ਵੱਲੋਂ ਲਗਭਗ ₹660 ਕਰੋੜ ਦੀ ਲਾਗਤ ਨਾਲ ਤਿਆਰ ਕੀਤਾ ਗਿਆ ਹੈ।

ਇਹ 300 ਬਿਸਤਰੇ ਵਾਲਾ ਇੱਕ ਤੀਸਰੇ ਦਰਜੇ ਦਾ ਕੈਂਸਰ ਇਲਾਜ ਕੇਂਦਰ ਹੈ, ਜਿੱਥੇ ਸਰਜਰੀ, ਰੇਡੀਓਥੈਰੇਪੀ, ਕੀਮੋਥੈਰੇਪੀ, ਇਮਿਊਨੋਥੈਰੇਪੀ ਅਤੇ ਬੋਨ ਮੈਰੋ ਟ੍ਰਾਂਸਪਲਾਂਟ ਸਮੇਤ ਕੈਂਸਰ ਦੇ ਹਰ ਤਰ੍ਹਾਂ ਦੇ ਇਲਾਜ ਲਈ ਆਧੁਨਿਕ ਸਹੂਲਤਾਂ ਉਪਲਬਧ ਹਨ।

ਇਹ ਹਸਪਤਾਲ ਖੇਤਰ ਵਿੱਚ ਕੈਂਸਰ ਇਲਾਜ ਲਈ ਇੱਕ ‘ਹੱਬ’ ਵਜੋਂ ਕੰਮ ਕਰਦਾ ਹੈ, ਜਦਕਿ ਸੰਗਰੂਰ ਵਿੱਚ 150 ਬਿਸਤਰੇ ਵਾਲਾ ਹਸਪਤਾਲ ਇਸ ਦਾ ‘ਸਪੋਕ’ ਕੇਂਦਰ ਵਜੋਂ ਕੰਮ ਕਰਦਾ ਹੈ।

ਯੂਆਈਡੀਏਆਈ ਨੇ ਮੈਪਲਸ ਐਪ ਵਿੱਚ ਅਧਿਕਾਰਤ ਆਧਾਰ ਕੇਂਦਰ ਪ੍ਰਦਰਸ਼ਿਤ ਕਰਨ ਲਈ ਮੈਪਮਾਈਇੰਡੀਆ ਨਾਲ ਸਾਂਝੇਦਾਰੀ ਕੀਤੀ

ਇਹ ਸੁਵਿਧਾ ਆਉਣ ਵਾਲੇ ਮਹੀਨਿਆਂ ਵਿੱਚ ਉਪਲਬਧ ਹੋਵੇਗੀ ਅਤੇ ਲੋਕਾਂ ਨੂੰ ਨਜ਼ਦੀਕੀ ਅਧਿਕਾਰਤ ਆਧਾਰ ਕੇਂਦਰ ਦਾ ਪਤਾ ਲਗਾਉਣ ਅਤੇ ਉਪਲਬਧ ਸੇਵਾਵਾਂ ਦੀ ਜਾਂਚ ਕਰਨ ਵਿੱਚ ਮਦਦ ਕਰੇਗੀ

ਨਵੀਂ ਦਿੱਲੀ, 2 ਅਪ੍ਰੈਲ (ਹਰਸ਼ਦੀਪ ਸਿੰਘ ਮਹਿਦੂਦਾਂ): ਭਾਰਤ ਦੀ ਵਿਲੱਖਣ ਪਛਾਣ ਅਥਾਰਿਟੀ (ਯੂਆਈਡੀਏਆਈ) ਨੇ ਮੈਪਮਾਈਇੰਡੀਆ ਨਾਲ ਇੱਕ ਸਮਝੌਤਾ ਕੀਤਾ ਹੈ, ਜਿਸ ਦੇ ਤਹਿਤ ਆਉਣ ਵਾਲੇ ਮਹੀਨਿਆਂ ਵਿੱਚ ਉਨ੍ਹਾਂ ਦੀ ਮੈਪਲਸ ਐਪ ਉੱਤੇ ਅਧਿਕਾਰਤ ਆਧਾਰ ਕੇਂਦਰਾਂ ਨੂੰ ਪ੍ਰਦਰਸ਼ਿਤ ਕੀਤਾ ਜਾ ਸਕੇਗਾ। ਇਹ ਕਦਮ ਨਿਵਾਸੀਆਂ ਲਈ ਸੁਵਿਧਾ ਵਧਾਵੇਗਾ।

ਇਸ ਕਦਮ ਤੋਂ ਲੋਕਾਂ ਨੂੰ ਅਧਿਕਾਰਤ ਆਧਾਰ ਕੇਂਦਰਾਂ ਦੀ ਪਛਾਣ ਕਰਨ ਅਤੇ ਉਨ੍ਹਾਂ ਤੱਕ ਪਹੁੰਚਣ ਵਿੱਚ ਮਦਦ ਮਿਲਣ ਦੀ ਉਮੀਦ ਹੈ। ਨਾਲ ਹੀ, ਨਿਵਾਸੀਆਂ ਨੂੰ ਦਿੱਤੀ ਜਾਣ ਵਾਲੀ ਬਾਲਗ ਨਾਮਾਂਕਣ, ਬਾਲ ਨਾਮਾਂਕਣ ਜਾਂ ਸਿਰਫ਼ ਪਤਾ ਅਤੇ ਮੋਬਾਈਲ ਨੰਬਰ ਅਪਡੇਟ ਕਰਨ ਵਰਗੀਆਂ ਸੇਵਾਵਾਂ ਦੀ ਪ੍ਰਕਿਰਤੀ ਦੇ ਆਧਾਰ ਉੱਤੇ ਆਧਾਰ ਕੇਂਦਰਾਂ ਦੀ ਪਛਾਣ ਕਰਨ ਵਿੱਚ ਮਦਦ ਮਿਲੇਗੀ।

ਇਸ ਸਹਿਯੋਗ ਦਾ ਉਦੇਸ਼ ਜਨਸੁਵਿਧਾ ਨੂੰ ਵਧਾਉਣਾ, ਗਲਤ ਸੂਚਨਾਵਾਂ ਤੋਂ ਬਚਾਉਣਾ ਅਤੇ ਇਹ ਯਕੀਨੀ ਬਣਾਉਣਾ ਹੈ ਕਿ ਨਿਵਾਸੀਆਂ ਨੂੰ ਦੇਸ਼ ਭਰ ਵਿੱਚ ਅਤਿਆਧੁਨਿਕ ਆਧਾਰ ਸੇਵਾ ਕੇਂਦਰਾਂ (ਏਐੱਸਕੇ) ਅਤੇ ਹੋਰ ਆਧਾਰ ਕੇਂਦਰਾਂ ਤੱਕ ਨਿਰਵਿਘਨ ਪਹੁੰਚ ਪ੍ਰਾਪਤ ਹੋਵੇ। ਇਸ ਸਮਝੌਤੇ ਉੱਤੇ 1 ਅਪ੍ਰੈਲ, 2026 ਨੂੰ ਹਸਤਾਖਰ ਕੀਤੇ ਗਏ।

ਯੂਆਈਡੀਏਆਈ ਦੇ ਸੀਈਓ ਸ਼੍ਰੀ ਭੁਵਨੇਸ਼ ਕੁਮਾਰ ਨੇ ਕਿਹਾ, "ਯੂਆਈਡੀਏਆਈ ਦੀਆਂ ਸੇਵਾਵਾਂ ਦੇ ਮੱਧ ਵਿੱਚ ਹਮੇਸ਼ਾ ਨਿਵਾਸੀ ਰਹੇ ਹਨ। ਇਸ ਤਰ੍ਹਾਂ ਦੇ ਸਹਿਯੋਗ ਤੋਂ ਪੂਰੇ ਭਾਰਤ ਵਿੱਚ ਸਤਿਆਪਿਤ ਆਧਾਰ ਕੇਂਦਰਾਂ ਦੀ ਡਿਜੀਟਲ ਮੈਪਿੰਗ ਸੰਭਵ ਹੋ ਸਕੇਗੀ ਅਤੇ ਲੋਕਾਂ ਨੂੰ ਅਧਿਕਾਰਤ ਆਧਾਰ ਕੇਂਦਰ ਸਰਲਤਾ ਨਾਲ ਖੋਜਣ ਵਿੱਚ ਮਦਦ ਮਿਲੇਗੀ।"

ਅਗਲੇ ਕੁੱਝ ਮਹੀਨਿਆਂ ਵਿੱਚ ਇਸ ਦੇ ਲਾਗੂ ਹੋਣ ਤੋਂ ਬਾਅਦ, ਇਹ ਯਕੀਨੀ ਹੋਵੇਗਾ ਕਿ ਜਦੋਂ ਉਪਭੋਗਤਾ ਮੈਪਲਸ ਐਪ ਉੱਤੇ ਖੋਜ ਕਰਨਗੇ, ਤਾਂ ਉਨ੍ਹਾਂ ਨੂੰ ਅਧਿਕਾਰਤ ਆਧਾਰ ਕੇਂਦਰਾਂ ਵੱਲ ਨਿਰਦੇਸ਼ਿਤ ਕੀਤਾ ਜਾਵੇ। ਮੈਪਮਾਈਇੰਡੀਆ, ਯੂਆਈਡੀਏਆਈ ਵੱਲੋਂ ਪ੍ਰਦਾਨ ਕੀਤੀ ਗਈ ਆਧਾਰ ਕੇਂਦਰ ਜਾਣਕਾਰੀ ਨੂੰ ਮੈਪਲਸ ਪਲੈਟਫਾਰਮ ਵਿੱਚ ਏਕੀਕ੍ਰਿਤ ਕਰੇਗਾ ਅਤੇ ਆਧਾਰ ਕੇਂਦਰਾਂ ਦਾ ਸਟੀਕ ਪ੍ਰਤੀਨਿਧਿਤਵ, ਡਿਜੀਟਲ ਮੈਪਿੰਗ ਅਤੇ ਵੱਖ-ਵੱਖ ਸੂਚੀ ਯਕੀਨੀ ਬਣਾਵੇਗਾ।

ਮੈਪਮਾਈਇੰਡੀਆ ਦੇ ਸਹਿ-ਸੰਸਥਾਪਕ ਅਤੇ ਸੀਐੱਮਡੀ ਰਾਕੇਸ਼ ਵਰਮਾ ਨੇ ਕਿਹਾ, "ਯੂਆਈਡੀਏਆਈ ਦੀ ਸੇਵਾ ਕਰਨਾ ਅਤੇ ਮੈਪਲਸ ਐਪ ਦੇ ਮਾਧਿਅਮ ਤੋਂ ਲੋਕਾਂ ਨੂੰ ਆਧਾਰ ਕੇਂਦਰਾਂ ਤੱਕ ਸੁਗਮ ਪਹੁੰਚ ਪ੍ਰਦਾਨ ਕਰਨਾ ਮੇਰੇ ਲਈ ਖੁਸ਼ਕਿਸਮਤੀ ਦੀ ਗੱਲ ਹੈ।"